Yurtimiz sport tarixidagi muhim musobaqa — futzal bo‘yicha FIFA Jahon chempionatiga qisqa muddat qolmoqda. Mazkur nufuzli musobaqaga tayyorgalik jarayoni ayni kunga kelib qizg‘in pallaga kirdi.

Bugun O‘FA rahbariyati Buxoro viloyatidagi Jahon chempionatiga tayyorgarlik jarayonini ko‘zdan kechirdi. Ma’lumki, Buxorodagi «Universal» sport majmuasi Futzal bo‘yicha Jahon chempionatining guruh bosqichida Fransiya, Braziliya, Xorvatiya, Niderlandiya, Gvatemala, Venesuela, Eron, Paragvay, Kuba va Tailand singari nomdir jamoalar ishtirokidagi uchrashuvlarni, shuningdek, play-off o‘yinlarini o‘zida qabul qiladi.

Buxoro viloyati hokimi, viloyat futbol assosiasiyasi prezidenti Botir Zaripov, O‘FA birinchi vise-prezidenti Ravshan Irmatov hamda Vazirlar Mahkamasi sport masalalari mas’uli Rashid Talipov boshchiligidagi ishchi guruh «Universal» sport majmuasi, maydoni, jamoalarning kiyim almashtirish xonalari, media markaz, tashkiliy-ma’muriy ob’ektlar va mashg‘ulot zallarini zamonaviy ko‘rinishga keltirish hamda FIFA standartiga muvofiqlashtirish bo‘yicha ishlarni o‘rgandi.

OAV, muxlislar va tashrif buyuruvchilar uchun qulayliklar yaratish yuzasidan keyingi rejalar belgilandi. Ishtirokchi jamoalar joylashadigan mehmonxonalar o‘rganilib, zarur tavsiyalar berildi.

Shuningdek, inspeksiya davomida Buxoro mezbonlik qiladigan FIFA Jahon chempionatini o‘yinlarini yuqori saviyada tashkil etish bo‘yicha navbatdagi ishlar muhokama qilindi.