Футзал бўйича Ўзбекистон кубоги финали якунлангач, «Локомотив» бош мураббийи Ахаджон Юсупов ўйин борасидаги фикрлари билан ўртоқлашди:

— Ўйин жуда қийин кечди, — деди Аҳаджон Юсупов ўз эҳтиросларини яширолмай. — «Ардус» кучли жамоа. Буни улар нафақат ички чемпионат, балки халқаро майдонларда ҳам кўрсатиб келишяпти. Шунга қарамай, бугун майдонга фақат ғалаба умидида тушгандик. Йигитларга раҳмат, улар ўйин олдидан берилган кўрсатмаларни аниқ бажаришга ҳаракат қилишди. 3:1 ҳисобида олдинга чиқиб олганимиздан кейин йигитлар бироз хотиржамликка берилишди ва оқибатда ўз дарвозамиздан гол ўтказиб юбордик. Қўшимча бўлим ҳам якунланишига яқин қолганда, биз ўзимизни руҳан пенальтилар сериясига тайёрлай бошлаганимизда Даврон Чориев ўйиндаги учинчи голини киритиб, жамоамизга ғалаба келтирди. Ҳозир беҳад хурсандман ва ўз навбатида жамоамизни ҳар томонлама қўллаб-қувватлаб келаётган «Ўзбекистон темир йўллари» ДАТК ҳамда «Локомотив» профессионал футбол клубига раҳбариятига миннатдорчилик билдираман. Ғалабамиз орқали жамоа мухлисларини қувонтирдик, деб ўйлайман ва олдимизда турган Ўзбекистон чемпионатида ҳам улар ишончини оқлашга ҳаракат қиламиз.