Ўзбекистон Суперлигаси 12-туридан ўрин олган  “Навбаҳор” – “Қизилқум” жамоалари ўртасидаги учрашув арафасида “лочинлар”нинг сербиялик 32 ёшли тажрибали ҳимоячиси Филип Иванович бўлажак баҳс ҳақидаги фикрлари билан ўртоқлашди.

- Бўлажак рақибимиз “Қизилқум” жорий мавсумда ўзгача ўйин намойиш этмоқда. Навоийликлар етакчи клубларга муносиб қаршилик кўрсата олишаётган бўлсада, айрим учрашувларда ўртамиёна жамоалардан мағлубиятга учрашмоқда. Таъкидлаш жоизки, Суперлиганинг бу йилги ўйинлари анча қизиқарли кечмоқда. Жорий мавсумда Суперлигада кучсиз жамоалар йўқ.

Хабарингиз бор, сўнгги беллашувларда дуранг натижалар қайд этиб, мухлисларни ранжитиб қўйдик. Шу боис, бўлажак учрашувда майдонга ғалаба иштиёқида тушиб, мухлисларга қувонч улашиш учун барча имкониятимизни ишга соламиз.

Ишқибозлардан эса жамоамизни бевосита стадионда муносиб тарзда қўллаб-қувватлаб, ғалабамизга мададкор бўлишларини сўраб қоламан. Биз эса таъкидлаганимдек, уларнинг ишончларини оқлаш, уйларига хурсанд ҳолда қайтишлари учун рақибни мағлубиятга учратишга ҳаракат қиламиз.

Жорий мавсумда жамоамиз ўз олдига қўйган мақсадига эришади, деган умиддаман, - деди Филип Иванович.