O‘zbekiston Superligasi 12-turidan o‘rin olgan  “Navbahor” – “Qizilqum” jamoalari o‘rtasidagi uchrashuv arafasida “lochinlar”ning serbiyalik 32 yoshli tajribali himoyachisi Filip Ivanovich bo‘lajak bahs haqidagi fikrlari bilan o‘rtoqlashdi.

- Bo‘lajak raqibimiz “Qizilqum” joriy mavsumda o‘zgacha o‘yin namoyish etmoqda. Navoiyliklar yetakchi klublarga munosib qarshilik ko‘rsata olishayotgan bo‘lsada, ayrim uchrashuvlarda o‘rtamiyona jamoalardan mag‘lubiyatga uchrashmoqda. Ta’kidlash joizki, Superliganing bu yilgi o‘yinlari ancha qiziqarli kechmoqda. Joriy mavsumda Superligada kuchsiz jamoalar yo‘q.

Xabaringiz bor, so‘nggi bellashuvlarda durang natijalar qayd etib, muxlislarni ranjitib qo‘ydik. Shu bois, bo‘lajak uchrashuvda maydonga g‘alaba ishtiyoqida tushib, muxlislarga quvonch ulashish uchun barcha imkoniyatimizni ishga solamiz.

Ishqibozlardan esa jamoamizni bevosita stadionda munosib tarzda qo‘llab-quvvatlab, g‘alabamizga madadkor bo‘lishlarini so‘rab qolaman. Biz esa ta’kidlaganimdek, ularning ishonchlarini oqlash, uylariga xursand holda qaytishlari uchun raqibni mag‘lubiyatga uchratishga harakat qilamiz.

Joriy mavsumda jamoamiz o‘z oldiga qo‘ygan maqsadiga erishadi, degan umiddaman, - dedi Filip Ivanovich.