Сербия терма жамоаси дарвозабони Иван Милинкович-Савич Евро-2024 ўйинлари вақтида нохуш ҳодисага дуч келди.
Telegraf.rs нашрининг хабар беришича, Сербия термасининг Дания билан гуруҳ босқичидаги ҳал қилувчи ўйини олдидан бош мураббий Драган Стойкович ўз футболчиларига бир кунлик дам берди.
Дарвозабон Милинкович-Савич дам олиш кунидан унумли фойдаланишга қарор қилди ва Мюнхендаги барлардан бирига борди ва у ерда маҳаллий хавфсизлик ходимлари билан муштлашиб кетди. Бар эгаси бу ҳақда батафсил гапириб берди.
"Иван бизнинг баримизга келди, лекин кираверишдаги қўриқчилар уни танимади ва ичкарига киритмоқчи ҳам бўлмади, чунки у терма жамоанинг кийимини кийган эди. Бу унинг жаҳлини чиқарди ва жанжал бошланди.
Тез орада гапга аралашиб, қўлидан ушлаб, мен билан боришини айтдим, лекин у рад этди. Ҳаммаси ресторан боғида содир бўлди. Унга нима улоқтиришганини ёки бир-бирларига нима дейишганини эшитмадим. Ниҳоят муаммони ҳал қилганимиздан хурсандман".
