Serbiya terma jamoasi darvozaboni Ivan Milinkovich-Savich Yevro-2024 o‘yinlari vaqtida noxush hodisaga duch keldi.
Telegraf.rs nashrining xabar berishicha, Serbiya termasining Daniya bilan guruh bosqichidagi hal qiluvchi o‘yini oldidan bosh murabbiy Dragan Stoykovich o‘z futbolchilariga bir kunlik dam berdi.
Darvozabon Milinkovich-Savich dam olish kunidan unumli foydalanishga qaror qildi va Myunxendagi barlardan biriga bordi va u yerda mahalliy xavfsizlik xodimlari bilan mushtlashib ketdi. Bar egasi bu haqda batafsil gapirib berdi.
"Ivan bizning barimizga keldi, lekin kiraverishdagi qo‘riqchilar uni tanimadi va ichkariga kiritmoqchi ham bo‘lmadi, chunki u terma jamoaning kiyimini kiygan edi. Bu uning jahlini chiqardi va janjal boshlandi.
Tez orada gapga aralashib, qo‘lidan ushlab, men bilan borishini aytdim, lekin u rad etdi. Hammasi restoran bog‘ida sodir bo‘ldi. Unga nima uloqtirishganini yoki bir-birlariga nima deyishganini eshitmadim. Nihoyat muammoni hal qilganimizdan xursandman".
