Нидерландия терма жамоаси ҳужумчиси Коди Гакпо Европа чемпионати 1/8 финалида Руминияни мағлуб этганидан сўнг (3:0) фикр билдирди. Айнан Гакпо гол урди ва голли узатмани амалга оширди ва учрашувнинг энг яхши футболчиси деб топилди.
"Физиотерапевтимиз бугун учрашувдаги биринчи голни уришимни айтди. Шу боис гол урганимда биринчи бўлиб унинг олдига югурдим. Умуман олганда, биз яхши ўйин кўрсатдик. Рақиб осон эмаслигини билардик, шунинг учун ҳам жанг қилишга тайёр эдик. Биз гол уришимиз керак эди ва биз шундай қилдик", деди Гакпо.
Нидерландия терма жамоаси Евро-2024 доирасидаги навбатдаги ўйинини 6 июл, шанба куни ўтказади.
