Ўзбек боксининг яқин ўтмишдаги юлдузи, бугунги кунда Ўзбекистон аёллар терма жамоаси бош мураббийи сифатида фаолият олиб бораётган Элшод Расулов қизларимизнинг Олимпиададаги имкониятлари ҳақида гапирди.
"Токио Олимпиадасидан сўнг қизларимиз билан 4 та лицензия қўлга кирита олдик. Бунинг замирида катта меҳнат турибди. Қизлар боксини ривожлантириш учун Ўзбекистон бокс федерацияси томонидан муносиб шароитлар яратиб берилди. Қизларимиз эса бу шароитлардан унумли фойдаланишди.
Бизда -75 кг вазн тоифасидаги қизимизда ҳам (Азиза Зокирова назарда тутилмоқда) лицензия қўлга киритиш имконияти бор эди. Аммо маълум сабабларга кўра у ҳал қилувчи баҳсда мағлубиятга учради. Кейинги мусобақаларда қолган қизларимиз ҳам камчиликларни бартараф этиб, керакли натижаларга эришишади деб ўйлайман", – деди Расулов.
