Жуд Беллингем Словенияга қарши ўйиндаги номақбул хатти-ҳаракатлари учун жаримага тортилди ва бир ўйинга четлатилди. Туркия футболчиси эса икки ўйинга четлатилди.

Англия терма жамоаси Евро—2024 1/8 финалида Словения термасини экстра таймларда (2:1) мағлуб этди.

Ўйиннинг 95-дақиқасида инглизлар ярим ҳимоячиси Жуд Беллингем ҳисобни тенглаштирди. “Реал Мадрид” футболчиси голдан сўнг номақбул ҳаракат қилиб голни нишонлади. У буни яқин дўстларга нисбатан ҳазил ишора эканлигини таъкидлаган эди.

УЕФА Беллингемни 30 минг евро жаримага тортди ва уни бир йиллик синов муддати билан битта ўйинга дисквалификация қилди. Четлатиш дарҳол амалга оширилмайди ва ушбу қарор қабул қилинган кундан бошлаб бир (1) йил синов муддати берилади.

Шу тариқа, Жуд турнирнинг чорак финалида Швейцария термасига қарши ўйинда иштирок этиши мумкин бўлади.

Бундан ташқари ташкилот Демирални 2 та ўйинга дисквалификация қилди.

Туркия терма жамоаси Демиралнинг дубли эвазига Австрияни мағлуб этиб (2:1) Евро—2024 чорак финалига чиққан эди. Саудия Арабистонининг “Ал-Аҳли” жамоаси шарафини ҳимоя қилаётган ҳимоячи Австрияда тақиқланган “кулранг бўри” ишораси билан жамоанинг кейинги босқичга чиққанини нишонлади.

Аввалроқ УЕФА ушбу эпизод бўйича тергов бошлаганини маълум қилган эди.

Футболчи “умумий хулқ-атвор тамойилларига риоя қилмагани, муносиб хулқ-атворнинг асосий қоидаларини бузгани ва спорт тадбирларидан спортга хос бўлмаган кўринишлар учун фойдалангани ва футбол обрўсига путур етказгани учун” дисквалификация қилинди.