"Локомотив" ва "Металлург" жамоалари ўртасидаги баҳсдан кейинги матбуот анжуманида меҳмонлар бош мураббийи Рустам Мирсодиқов иштирок этмади. Темирйўлчилар бош мураббийи Ҳаким Фузайлов эса ўз фикрлари билан ўртоқлашди.

Ҳаким Фузайлов, "Локомотив" бош мураббийи:
— ЎзПФЛда ўткинчи ўйиннинг ўзи йўқ. Ўйин қийин бўлди ва шундай бўлишини билардик. "Металлург" ўз майдонида "Пахтакор"ни мағлуб этди. Бекободликлар камчилик бўлиб қолишганига қарамай, яхши ўйин кўрсатишди. Уларнинг сафида техник жиҳатдан кучли ўйинчилар кўпчиликни ташкил қилади. Энг асосийси, ғалаба қозонганимиздан хурсандман.

— Санжар Турсунов бугун майдонга тушмади...
— Турсунов Фарғонадаги ўйинда жароҳат олганди. У "Андижон" билан кубок баҳсида ҳам иштирок эта олмади. У машғулотларни бошлади, аммо ҳали ўйинга тайёр эмас. Уни асрашга қарор қилдик. У "Пахтакор"га қарши ўйингача тайёр бўлиши керак.

— Ўтган йили "Локомотив" ўз уйида "Металлург"ни 5:1 ҳисобида енганди, бу сафар эса кичик ҳисобда мағлуб этди. Бекободликлар кучайишганми ёки "Локомотив" ўз савиясида ўйнай олмадими?
— Ўтган йили йирик ҳисобда ютган бўлсак-да, ўйин осон бўлмаганди. Биз ўшанда яратилган вазиятлардан фойдалана олгандик. Бугун ҳам вазиятлар кўп бўлди, аммо улардан фойдалана олмадик. "Металлург" кучли жамоа, унга қарши ўйнаш ҳар қандай жамоа осон бўлмайди.

— Ҳакам томонидан ҳисобга олинмаган учинчи гол борасида фикрингиз.
— Мен вазиятдан узоқ эди. Ҳакамлар эса воқеа жойига яқин туришганди. Балки тўп Тожиевнинг қўлига теккандир, аммо нима учун дарҳол вазиятга баҳо беришмаганини билмайман.