«Динамо» ПФК матбуот хизмати 2024 йилги мавсум биринчи давра якунларига кўра мухлислар ўртасида сўровнома ўтказиб, жамоанинг 1-даврадаги энг яхши ўйинчисини аниқлади. Сўровномада жами 3708та овоз берилди.

«Динамо» жамоаси 1-даврада Суперлигада 13та ўйин ўтказган бўлса, Ўзбекистон кубогида 3та баҳсда майдонга тушди. Бир ҳафта давом этган овоз бериш якунларига кўра, Кожо Жоэл энг кўп – 1769та овоз билан «Динамо» жамоасининг 1-даврадаги энг яхши ўйинчиси деб топилди. У Суперлигада 13 ўйинда 988 дақиқа тўп суриб, 4та гол, Ўзбекистон кубогида эса 3 ўйинда 3та голга муаллифлик қилди.

1-давранинг энг яхши ўйинчиси номига даъвогар яна бир ўйинчи Анваржон Ҳожимирзаев эса 1638та овоз билан 2-ўринни эгаллади. Анваржон 1-даврада Суперлигада 1009 дақиқа давомида 5та гол уриб, тўпурарлар рўйхатидан ўрин олган.

Учликдан 800та овоз билан бразилиялик легионер Ратиньо Феррейра жой олди. Таянч яримҳимоячиси Суперлигада 11 ўйинда 990 дақиқа ўйнаб, битта голга муаллифлик қилди.

Шунингдек, сўровнома иштирокчиларидан Санжар Шоаҳмедов (307та овоз), Салим Мустафоев (299та овоз) ва Душан Мийич (291та овоз) олган.