"Ливерпул"нинг собиқ бош мураббийи Юрген Клопп "мерсисайдликлар" клуби хайрия жамғармасининг фахрий элчисига айланди. Немис мутахассиси жамғармадаги фахрий лавозимга тайинлангани ҳақида "Ливерпуль" расмий сайтида эълон қилинган.

Эслатиб ўтамиз, 2024 йил январь ойи охирида Клопп 2023/2024 йилги мавсум якунида инглиз клубини тарк этишини эълон қилган эди. Кейинчалик Арне Слот бош мураббий сифатида Юрген Клопп ўрнини эгаллаши маълум бўлди ва "Ливерпуль" билан 2027 йилгача шартнома имзолаган эди.

Клопп клубни 2015 йилдан бери бошқариб келганди. Унинг қўл остида "Ливерпуль" еттита совринни қўлга киритди. "Мерсисайдликлар" ўтган мавсумни Англия Премьер-лигаси турнир жадвалида учинчи ўринда якунлади. Жамоа 38 учрашувда 82 очко жамғарган.