«Реал»нинг бир одати бор - рақобат туфайли футболчига мажбуран ошиқча пул тўлашни истамайди. Аввал футболчи билан келишиб, фақат «Реал»га ўтишга кўндиради уёғига, бир ўзи қолгач, кучли позиция эвазига истаган нархига клубни рози қилади. Бу фишка кўпинча, шартнома муддати бир йил қолган футболчиларга ишлайди. Футболчи «Реал»га ўтмоқчи бўлиб, янги шартномага кўнмагач, клуб текин бермаслик учун «Реал» нархига кўнишдан бошқа чораси қолмайди.
Охиргиси Камавинга билан бўлганди. 18 ёшида Франция терма жамоасида дебют қилган футболчини атиги 30 миллион еврога олган. 31 август куни келишув амалга ошган, бир кун кеч қолинганда, «Ренн» ўз юлдузи учун пул ололмай қоларди.
Энг машҳур воқеа Криштиану билан боғлиқ. Алекс Фергюсон ўз автобиографик китобида батафсил ёзган:
2008 йилда «МЮ» Чемпионлар Лигасини ютгач, Роналду «Реал»га ўтишга қарор қилади. Мадридликлар билан келишгач, МЮ билан бир йил муддат қолган шартномасини узайтирмайди. Инглизлар ҳам трансферга рози бўлишади. Аммо «Реал» «Олтин тўп»нинг ягона номзодига 30 миллион евро таклиф қилади. «МЮ» бир йил ўтиб текинга қўйиб юборишни истамаслигини билган «Реал»нинг қўлида козир бор эди - Роналдунинг истаги.
Аммо яна бир муҳим фактор бор эдики, «Реал» ҳисобга олмади. Криштиану ўз фаолияти учун Фергюсондан ўзини қарздор билар, отасидек яхши кўрарди. Фергюсон бу шартларда Роналдуни «Реал»га кетишига асло рози бўлмасди. У Роналдуга яна бир йил қолишни сўрайди - «ўғлим, сен «Реал»га ўтасан, лекин бу сафар эмас, мен сени Калдеронга сотмайман» дейди.
Роналду қолади ва мавсум бошида янги шартнома ҳам тузади. Бир йил ўтиб «МЮ» Роналдуни ўзи истаган нархда, салкам юз миллионга сотишга эришади. У пайтда Калдерон ўрнини Перес эгаллаганди.
Лени Йоро билан ҳам ўхшаш воқеа содир бўлди. «Реал» Йоронинг Мадридни хоҳлаётганидан фойдаланиб, «Лилл»га ё 25 миллион берамиз ё келаси йили текинга оламиз, деди. Таркибида уч нафар топ марказий ҳимоячиси бўлган «Реал» учун бу трансфер шошилинч эмас. Гўёки француз клубида бошқа вариант қолмади.
Аммо «МЮ» вазиятга аралашиб, жуда тез ҳаракат қилгани ҳаммасини бузиб юборди. Клуб «Лилл»га 50 миллион евро таклиф қилди. Табиийки, французлар «Реал»нинг чангалида қолиб кетишни истамай, Лени Йорони Манчестерга ўтишга кўндиришга ҳаракат қилди. Ёш футболчи ўзи улғайган клуб учун ҳам яхши якун бўлишини истайди, албатта.
Французлар «Реал»нинг олдидан ўтган бўлишиям шубҳасиз. «Реал» ўша пулни берса, футболчи яна Мадридни танлашиям аниқ. Аммо юқорида айтганимдек, «Реал» кучайтирилиши айни пайтда шарт бўлмаган позиция учун 50 миллион сарфламайди, иккинчидан, клуб рақобат аукционида ортиқча пул тўлашга одатланмаган.
