Ўзбекистон чемпионатининг 5-туридан ўрин олган «Пахтакор» ва «Динамо» жамоалари ўртасидаги учрашув ниоясига етгач, «шерлар» устози Мурод Исмоилов ўйин борасида ўз фикрларини билдириб ўтди.

«Бугун етакчи футболчиларимизга дам бериб, захирада ўтирган ўйинчиларимизга имконият беришга қарор қилдик. Чунки олдинда муҳим ўйинлар турибди ва бошқа футболчиларнинг ҳолатини билиб олишимиз лозим эди. Улар ишончни оқлашди. Биринчи бўлимда ўйин назоратини ўзимизда сақлаб турдик. Танаффусдан кейин тезлик билан рақиб дарвозага тўплар киритиб, ўйин тақдирини ҳал этдик. Суюнов, Махсталиев ҳамда Маматказин асосий таркибда деярли майдонга тушишмаётганди. Улар яхши ўйин намойиш қилишди».

«Кейинги учрашувни «Локомотив»га қарши ўтказамиз. Унга тайёргарликни одатдагидек олиб борамиз. Чунки биз ҳар бир баҳсда ғалаба қозониш учун майдонга чиқамиз. Бундай шароитда барча билан беллашувга жиддий тайёргарлик кўриш лозим. Бугун шу сабабдан ҳам енгил жароҳатланган Ҳошимов ва Козакни иккинчи бўлимда алмаштирдим», дея Исмоиловнинг сўзларидан иқтибос келтирмоқда «Пахтакор» расмий сайти.