Жорий йилнинг апрель ойини Ўзбекистонда, ҳеч бир муболағасиз, футзал ойи деб аташ мумкин. Охир-оқибат «Локомотив»нинг ғолиблиги билан якунига етган Ўзбекистон Кубоги баҳслари таассуротлари тарқаб улгурмасидан, Ўзбекистон чемпионати ярми финал ўйинлари эшик қоқиб турибди.

Мусобақанинг ушбу босқичи ҳақиқатан ҳам ҳал қилувчи бўлиб, унга бўлган қизиқиш ҳам жуда катта. Ҳар ҳолда, трибуналарда ишқибозлар етарли даражада кўп бўлган Ўзбекистон Кубоги ўйинларидан келиб чиқиб, шундай хулоса қилиш мумкин.

Шундай қилиб, Ўзбекистон футзал уюшмаси Ўзбекистон чемпионати ярим финал ўйинлари ўтказиладиган муддатларни белгилади. Учрашувлар 16-18 апрель кунлари «Ўзбекистон» спорт мажмуасида ўтказилади.

Эслатиб ўтамиз, ярим финалда қуйидаги жуфтликлар тўқнашади: «Локомотив» - «Максам-Чирчиқ» ва «Ардус» – «Бунёдкор». Жамоалар ўзаро иккитадан ўйин ўтказишади. Айни вақтда, иккита учрашувда ғолиб чиққан жамоа финал йўлланмасини қўлга киритади. Акс ҳолда, финалчи номини аниқлаш учун қўшимча учинчи ўйин ўтказилади.

Ўзбекистон чемпионати, ярим финал учрашувлари
16 апрель, сешанба
16:00. «Локомотив» – «Максам-Чирчиқ»
18:00. «Ардус» – «Бунёдкор»

17 апрель, чоршанба
16:00. «Локомотив» – «Максам-Чирчиқ»
18:00. «Ардус» – «Бунёдкор»