Польшанинг "Легия" клуби мухлислари "Заглембе" билан ўйинда қочқинларга қарши норозилик намойиши уюштиришди.

Варшава жамоасининг ғалабаси (2:0) билан якунланган Польша чемпионатининг 1-тур ўйинида "Легиа ультрас" инглиз тилида "Қочқинлар, хуш келибсиз" ёзуви туширилган баннерни осиб қўйди.

Расмда бейсбол таёқчаси ва болға тутган икки эркак ва чўчқа бошини ушлаб турган анъанавий кийимдаги аёл тасвирланган.

Sport.pl нашри қайд этганидек, мухлисларнинг ҳаракати Яқин Шарқ ва Африкадан Польшага қочқинлар оқимига қарши қаратилган эди - баннердаги чўчқанинг боши Ислом динига ишора қилади, унинг меъёрлари чўчқа гўштини истеъмол қилишни тақиқлайди.

Шунингдек, ўйин давомида мухлислар қочқинлар ҳақида беҳаё сўзлар айтишган.

Ижтимоий суғурта институти (ZUS) маълумотларига кўра, 2023 йил охирида Польшада рўйхатдан ўтган хорижликлар сони 1,1 миллион кишидан ошди.