“Янгиер” бош мураббийи Хайрулла Абдиев ўйин тўғрисида ўз фикрини билдирар экан, бугун шогирдлари ёмон ҳаракат қилишмаганини таъкидлади.

- Биринчи таймда шогирдларим яхши ўйин намойиш этишди. Танаффус чоғида футболчиларга мана шу темпда давом этишлари тайинлагандим. Лекин иккинчи бўлим бошида тезкор гол ўтказиб юборганимиз футболчиларнинг руҳиятига салбий таъсир кўрсатди. Таркибимиз ёшлардан иборат бўлгани учун улар руҳан ўзларини қўлга ололмадилар. Қолаверса, иккала голни ҳам стандарт вазиятдан ўтказиб юбордик. Ўша вазиятларда “иккинчи қават”даги курашларда рақибга ютқазиб қўйдик.

Албатта, мана шу камчиликларимиз устида ишлашимиз керак. “Андижон”ни ғалаба билан табриклайман. Мезбонларда барибир тажриба катта эди. Натижадан кўнглим тўлмаган бўлса-да, йигитлар яхши ўйнашга ҳаракат қилишди. Олдимиздаги вазифа кучли саккизталикдан жой олиб кейинги босқичда иштирок этиш.