Аргентина олимпия терма жамоаси бош мураббийи Хавьер Маскерано футбол бўйича Олимпиада турнирида Марокаш термаси билан ўйинни циркка қиёслади.
TyC Sports нашри Маскеранонинг сўзларидан иқтибос келтиради: "Бу мен ҳаётим давомида кўрган энг катта цирк".
Учрашув Сент-Эьтен шаҳрида бўлиб ўтди. Иккинчи бўлимга қўшиб берилган 16-дақиқада аргентиналиклар Кристиан Мединанинг голи эвазига ҳисобни тенглаштиришди (2:2), бироқ учрашувнинг бош ҳаками Гленн Нюберг ҳуштаги чалиб, ВАРни кўришга кетди. Бу вақтда трибуналарда тартибсизликлар бошланди; Полиция вакиллари майдонга югуришларига тўғри келди. Ҳар икки жамоанинг футболчилари ва аъзолари хавфсизлик нуқтаи назаридан кийим алмаштириш хоналарига жўнатилди.
Деярли икки соат ўтгач, ҳакам ВАРни кўриб чиқди ва Аргентинанинг иккинчи голи вақтида офсайд қайд этди. Ўйин 2:1 ҳисобида Марокаш фойдасига давом этди. Якунда марокашликлар ғалабани сақлаб қолишди.
Аргентина ва Марокаш терма жамоалари Ироқ ва Украина терма жамоалари билан бир қаторда "B" гуруҳида иштирок этишади. Футбол бўйича Олимпия ўйинлари 24 июлдан 10 августгача Франциянинг етти шаҳрида бўлиб ўтади.
