Мюнхен (Германия) прокуратураси 2024-йилги Олимпия ўйинлари иштирокчиси, 2015-йилгача Германия термаси шарафини ҳимоя қилган от спорти бўйича Австрия олимпия терма жамоаси аъзоси Макс Кюнерга нисбатан иш очган. У ҳайвонларга шафқатсиз муносабатда бўлганликда айбланмоқда.

Мюнхенда туғилган 50 ёшли Кюнер Германияда отни бошқаришда тақиқланган усулни қўллаганликда гумон қилинмоқда, бу усулда ҳайвонни баландроқ сакратиш учун оёқларига урилади.

Жараёнга қарамай, Кюнер Париждаги Олимпия ўйинларида қатнашиши мумкин.

Аввалроқ Халқаро от спорти федерацияси Олимпиада чемпиони британиялик чавандоз Шарлотта Дюжарденни ҳайвонларга нисбатан шафқатсиз муносабатда бўлгани учун олти ойга спортдан четлатган эди.