20 апрель куни Косонсойдаги «Марказий» ўйингоҳда футбол байрами.

Шу куни «Навбаҳор» Олий лиганинг 6-туридан ўрин олган учрашувда «Гулистон»ни қабул қилади. Мавсум дебьютанти саналган сирдарёликлар чемпионатни ёмон бошлашмади. Ортда қолган 5 учрашувда ўз ҳисобларига 8 очкони расмийлаштириб қўйишди. Қизиғи, Бахтиёр Ашурматов шогирдлари шунча ўйинда атиги 1 марта тўп ўтказиб юборишган холос. Ўша голни ҳам «Бунёдкор» урганди.

Ашурматов рақобатбардош жамоа шакллантираётгани кўриниб турибди. Лекин олдиндан баҳо бериб бўлмайди. Кўрганмиз, аввалги мавсумларда ҳам дебьютантлар шов-шув кўтариб, иккинчи даврада яна ўз «поғоналари»га қайтишган. Умуман олганда, мазкур учрашувда «Навбаҳор»ни фаворит деб айтиб ўтишимиз мумкин. Сўнгги учрашувлардаги натижалар «лочинлар»ни иштаҳасини очиб юборгани рост. Ҳар ҳолда шанба куни биз қизиқарли учрашувлардан бирини гувоҳига айланамиз.

Мазкур жамоалар Олий лигада кўп тўқнаш келишмаган. Ҳозиргача бор йўғи 8 марта ўзаро куч синашган, холос. Ўтказилган учрашувларда устунлик «Навбаҳор» тарафида эканлигини англаш қийинмас. Айтиш керакки, «Гулистон» «лочинлар»дан фақатгина бир очко олган холос! Қолган 7 учрашувда мағлуб бўлишган. Тўплар нисбати 30-5, албатта «Навбаҳор» фойдасига.

Дарвоқе, «Гулистон»нинг ўз тарихидаги энг йирик мағлубияти ҳам «Навбаҳор» билан боғлиқ. 1994 йил наманганликлар ўз майдонларида рақибларини 8:0 ҳисобида янчиб ташлашганди. Ҳозирча «Гулистон»нинг бу антирекордни бошқа жамоалар бузишганича йўқ.

20 апрель, шанба
«Навбаҳор» (Наманган) – «Гулистон» (Гулистон)
Ҳакамлар: С. Зайлобиддинов (Фарғона), Х. Мирзааҳмедов (Тошкент вилояти), А. Снетков (Тошкент вилояти), Т. Тўхтасинов (Андижон).
Назоратчи: Р. Айтеков (Тошкент).

ЎЗАРО ЎЙИНЛАР НАТИЖАЛАРИ

1993 йил
«Навбаҳор» - «Шифокор» 5:0
«Шифокор» - «Навбаҳор» 2:4

1994 йил
«Навбаҳор» - «Гулистон» 8:0
«Гулистон» - «Навбаҳор» 0:4

2000 йил
«Гулистон» - «Навбаҳор» 1:2
«Навбаҳор» - «Гулистон» 5:1

2003 йил
«Гулистон» - «Навбаҳор» 0:0
«Навбаҳор» - «Гулистон» 2:1.

Улуғбек АБДУЛЛАЕВ тайёрлади.