Норвегия футбол ассоциацияси ВАР тизимидан воз кечиши мумкин, деб хабар беради TV2.no сайти.
Манбага кўра, бу масала 2025 йилнинг март ойида бўлиб ўтадиган футбол конгрессида муҳокама қилинади. Агар кўпчилик овоз берса, ВАР бекор қилиниши мумкин.
Унгача Норвегия футболида ВАР тизимининг афзалликлари ва камчиликларини ўрганиш бўйича ишчи гуруҳ тузилади. Гуруҳ клуб вакиллари, мухлислар, футболчилар, мураббийлар ва ҳакамлардан иборат бўлиб, уни четдан келган мутахассис бошқаради.
Норвегияда мухлислар видеотакрор тизимидан фойдаланишга қарши. Акциялардан бири миллий чемпионатнинг 15-туридан ўрин олган "Леркендал" стадионида бўлиб ўтган "Русенборг" – "Лиллестрём" учрашувида бўлиб ўтди. Мухлислар майдонга балиқ маҳсулотларини улоқтира бошлашди, бу эса ўйиннинг тўхтатилишига сабаб бўлди.
Аввалроқ Англия чемпионатида ҳам ВАРни бекор қилиш ғояси пайдо бўлганди. Бироқ умумий йиғилишда кўпчилик клублар видеоёрдамчи ҳакам тизимидан фойдаланишни давом эттиришни қўллаб-қувватлади. 20 та клубдан фақат "Вулверхэмптон" қарши овоз берди.
