Norvegiya futbol assosiasiyasi VAR tizimidan voz kechishi mumkin, deb xabar beradi TV2.no sayti.

Manbaga ko‘ra, bu masala 2025 yilning mart oyida bo‘lib o‘tadigan futbol kongressida muhokama qilinadi. Agar ko‘pchilik ovoz bersa, VAR bekor qilinishi mumkin.

Ungacha Norvegiya futbolida VAR tizimining afzalliklari va kamchiliklarini o‘rganish bo‘yicha ishchi guruh tuziladi. Guruh klub vakillari, muxlislar, futbolchilar, murabbiylar va hakamlardan iborat bo‘lib, uni chetdan kelgan mutaxassis boshqaradi.

Norvegiyada muxlislar videotakror tizimidan foydalanishga qarshi. Aksiyalardan biri milliy chempionatning 15-turidan o‘rin olgan "Lerkendal" stadionida bo‘lib o‘tgan "Rusenborg" – "Lillestryom" uchrashuvida bo‘lib o‘tdi. Muxlislar maydonga baliq mahsulotlarini uloqtira boshlashdi, bu esa o‘yinning to‘xtatilishiga sabab bo‘ldi.

Avvalroq Angliya chempionatida ham VARni bekor qilish g‘oyasi paydo bo‘lgandi. Biroq umumiy yig‘ilishda ko‘pchilik klublar videoyordamchi hakam tizimidan foydalanishni davom ettirishni qo‘llab-quvvatladi. 20 ta klubdan faqat "Vulverxempton" qarshi ovoz berdi.