«Атлетико» «Валенсия» футболчиси Хави Геррага қизиқиш билдирмоқда.

Мадридликлар футболчи учун 25 миллион евро ва келажакдаги сотувларнинг маълум фоизини тўлашга тайёр. Агар Конор Галлахернинг «Челси»дан трансфери амалга ошмаса, расмий таклиф юборилади. Айни дамда испанлар англияликдан розилик олмагани учун келишув шубҳа остида.

«Валенсия» ўз навбатида 21 ёшли ярим ҳимоячини сотишга тайёр. Бироқ клуб аввалроқ «Жирона»нинг 20 миллион евролик белгиланган таклифини рад этганди. Клуб раҳбарияти футболчини сотишдан сезиларли фойда олишдан манфаатдор.

Шунингдек, июнь ойи бошида футболчига «Барселона» қизиқаётгани ҳақида хабар берилганди.

Ўтган мавсумда Герра Ла Лигада 36 та ўйинда майдонга тушиб, 4 та гол урди ва битта голли узатмани амалга оширди.