Мадриднинг «Реал» клуби собиқ сардори Фернандо Йерро «Сантьяго Бернабео»да бўлиб ўтган ўзига хос учрашувда иштирок этди. Ўйинда «Реал» ва «Ювентус»да бир вақтлар тўп тепган футболчилар қатнашишди.

Учрашувдан кейин журналистлар Йеррога Бланкос дарвозабони Икер Касильяснинг захира ўриндиғида қолиб кетаётгани ҳақида савол беришди.

«Менимча Икер хавотир оладиган ҳолатда эмас. У футболчи ва бундай ҳолатларни тушунади. Энг муҳими, инсонларнинг Касильяс «Реал» ва Испания футболи учун қанчалик муҳим эканини билишдир. Футбол ўйнашдан ҳам мақсад шу аслида.

У жароҳатдан қайтди ва тикланиш учун вақт керак. Унинг посицияси бироқ ноодатийроқ. Дарвозабон ҳар доим тайёр бўлиши керак, чунки ҳар лаҳзада нимадир бўлиб қолиши мумкин. Икер жамоа ва мамлакат футболи учун жуда керак, лекин дарвозабонларнинг ичидан биттасини танлаш керак. Мураббий уни танласа ўйнайди, бўлмаса дам олади. Бунга қарши чиқиш ярамайди»,- дейди Йерро.