Ўзбекистонда мухлислик борасида етакчи саналган водийлик мухлислар ўз жамоаларини етакчи ўринларда кўришмаганига ҳам анча бўлди.

Жорий йилги мавсумни Олий лигада мунтазам иштирок этаётган, бой тарихга эга "Нефтчи" ва "Навбаҳор" жамоалари жуда бўш бошлашди. Айниқса, фарғоналиклардан бундай натижани кўпчилик кутмаганди ҳам. Ортда қолган 5 учрашувда ҳар икки водий жамоаси ўз ҳисобига биргина ғалабани ёздириб қўйди, холос.

Умуман олганда, ҳозирги ҳолатга ўхшаш вазиятлар аввал ҳам икки жамоада ҳам бўлган. Аммо айни маҳалдаги кўрсаткич бу - икки жамоанинг ўз тарихидаги энг ёмон натижаларидан бўлиб турибди. Хусусан, "Навбаҳор" ҳозиргача мавсумни кетма-кет 3 та мағлубият билан бошламаган эди. "Яхши от кейин чопади", деган ажойиб нақл бор халқимизда. Лекин ҳақиқаттан ҳам "Нефтчи" ва "Навбаҳор" "яхши от"микин, деган савол туғилади.

Фарғоналиклар аввалги мавсумлардаги таркибнинг ўзагини сақлаб қолишган эрса-да, негадир жамоа ўйини унчалик қовушмаяпти. Балки бу ерда биз билмаган бошқа масалалар бордир? Олдинги йилларда ҳам "Нефтчи" борасида турли-туман гаплар урчиганди. Бироқ, алал-оқибат "Нефтчи" ўзига келиб олганди.

Ишониб қоламизки, ҳали "Навбаҳор" ҳам, "Нефтчи" ҳам ўз сўзини айтади. Асосийси жамоалар шунга қодир! Ўз навбатида бугун ҳар икки жамоани ҳам муҳим ўйинлар кутиб турибди. Албатта, водий жамоaлари бугун ўзларининг мавсумдаги иккинчи ғалабаларини тантана қилишади. Бу борада "Нефтчи" ва "Навбаҳор"га омад тилаб қоламиз!

Улуғбек АБДУЛЛАЕВ.