10-август куни Андижон шаҳрида Футзал бўйича жаҳон чемпионати совринини таништириш – “Trophy Experience” тадбири старт олди.

Тадбир дастлаб болалар фестивали ва кубок кўргазмаси билан бошланди.

Тадбирга Андижон шаҳридаги спорт мактабларидан ҳамда аҳолининг ижимоий ҳимояга муҳтож қатламидан 300 нафарга яқин болалар таклиф этилди.

Сентябр ойида бошланадиган футзал бўйича Жаҳон чемпионати баҳсларини қабул қиладиган “Универсал” спорт мажмуасида эса тадбир давомида турли кўнгилочар дастурлар – спорт мусобақалари, бошловчи томонидан ташкил этилган викторина ва танловлар ўтказилди. Тадбир якунида иштирокчиларга эсдалик совғалари тарқатилди.

Шунингдек, биринчи маротаба футзал бўйича Жаҳон кубоги маскоти – Хон расман оммага таништирилди. Ушбу тимсол яратилишида Ўрта Осиё, Шимолий Эрон ҳамда Кавказортида яшаган Турон йўлбарси асос қилиб олинди.

“Trophy Experience” тадбири кейинроқ Андижон шаҳридаги Эко боғда давом эттирилди. У ерда ҳам мухлислар ушбу соврин билан суратга тушишга ва танловда иштирок этиб, совғалар ютиб олишга муваффақ бўлишди.

Таъкидлаш лозим, тадбир меҳмонлари орасида Андижон вилояти ҳокими Шуҳратбек Абдураҳмонов ҳам бор эди. “Trophy Experience” тадбирининг навбатдагиси Фарғона шаҳрида ўтказилиб, мамлакатимизнинг бошқа ҳудудларида 24-августга қадар давом этади.