Кеча Қозоғистон чемпионатининг 6-тур ўйинлари бўлиб ўтди. Премьер-лиганинг 3та клубида фаолият олиб бораётган легионерлеримизнинг ҳаракатлари ҳақида хабар бериб ўтамиз.

Ушбу турда "Жетису" ўз майдонида "Иртиш"ни қабул қилди. Толдиқўрғонликлар сафида Шавкат Саломов тўлиқ ҳаракат қилган бўлса, Мелзиддиновнинг карточкалари сони 4тага етгани боис, ушбу ўйинни ўтказиб юборди. "Иртиш" ҳужумчиси Улуғбек Бақоев ҳам 90 дақиқа майдонда тер тўкди. Ғалаба эса "Жетису"га насиб қилди (1:0). Омари Тетрадзе шогирдлари кетма-кет 5та дурангдан кейин ниҳоят ғалаба қозонишди. Бу жамоалар 8 очко тўплаган ҳолда 6 ва 7-ўринларни эгаллаб туришибди.

"Актобе" эса пойтахтда "Астана" меҳмони бўлди. Александр Гейнрих жароҳати боис жамоасига ёрдам бера олмади. Унинг жароҳати ҳақида жамоа бош мураббийи Владимир Никитенко қуйидагиларни айтиб ўтди: "Муаммо сунъий қопламали майдондан табиий майдонга ўтиш билан боғлиқдир, балки зич тақвим туфайлидир, аммо жамоада жароҳатлар сони ошиб кетди. Нафақат Гейнрих, балки бугун Ковальчук ва Кападзе жароҳатдан кейин биринчи марта ўйнашди. Саша эса бир неча кундан кейин соғайиб кетади, деб ўйлайман".

Учрашувни Бикмаев ва Кападзе бошланғич таркибда бошлашди. Марат ўйиннинг охиригача ўйнаган бўлса, Темур 67-дақиқада алмаштирилди. Ўйин эса "Актобе"нинг қийин ғалабаси билан якунланди — 2:1. Ушбу ғалабадан актобеликлар мусобақа жадвалида 1-ўринга кўтарилиб олишди.