"Ливерпуль" вингери Луис Диас бошқа инглиз топ-клуби билан шартнома борасида келишиб олгани йўқ. Олдинроқ испан матбуотида колумбиялик футболчи "Манчестер Сити" билан ҳамкорлик шартларини келишиб олгани ҳақида маълумот пайдо бўлганди.

Журналист Фабрицио Романонинг маълумотларига кўра, юқоридаги миш-мишлар ҳақиқатга тўғри келмайди. "Манчестер Сити" "Ливерпуль"дан Диасни сотиб олмоқчи эмас, футболчининг ўзи эса бошқа инглиз клубига ўтишни истамаяпти.

Эслатиб ўтамиз, аввалроқ Диас "Барселона"га ўтиши мумкинлиги ҳақида хабарлар тарқалган эди. Матбуотда "Ливерпуль" колумбиялик футболчини 60 миллион евро товон пули эвазига қўйиб юборишга тайёрлиги ҳақида миш-мишлар тарқалди.