"Барселона" футболчиси Ламин Ямалнинг пичоқланган отаси Мунир Насрауи шифохонадан алоқага чиқди.

Барселона яқинидаги Матаро шаҳридаги автотураргоҳда ҳужумга учраган 17 ёшли Ямалнинг отаси касалхонага ётқизилди. Уч киши ҳибсга олингани хабар қилинган.

Бўлимга кўчирилган Насрауи ҳозир ўзини яхши ҳис қилаётганини айтди.

"Мен хотиржамроқ бўлишим керак, чунки бошқа иложим йўқ. Адолат, албатта, ўз ишини бажаради - бу энг муҳими. Биз ҳамма учун, мен ва оилам манфаати учун хотиржамроқ бўлишимиз керак.

Албатта, мен ҳам қўрқдим, ўзимни ҳаёт ва ўлим орасида кўрдим, ҳар қандай одам каби қўрқдим. Қачон рухсат беришларини билмайман, тезроқ бўлади деган умиддаман, яна гапира олганимдан миннатдорман.

Умид қиламанки, бу йил "Барселона" ажойиб жамоа бўлади ва биз катта муваффақиятларга эришамиз", - деди Ямал отаси El Chiringuito билан суҳбатда.