“Бунёдкор-2” жамоасига қарши учрашувдан сўнг андижонликлар устози Азамат Абдураимов ўйин тўғрисида ўз фикрини билдирди. Айтиш керакки, бош мураббий гарчи жамоаси ғалаба қозонган бўлса-да, шогирдлари кўрсатган ўйиндан кўнгли тўлмаганини яширмади.

— Албатта, ғалаба қозониш ёқимли. Аммо бугунги баҳсда бир ўз ўйинимизни намойиш эта олмадик. “Бунёдкор-2” жамоаси айни пайтда турнир жадвалида сўнгги ўринда бораётган бўлсағда, бизга муносиб қаршилик кўрсатди. Таркиб ёш футболчилардан ташкил топган бўлишига қарамай, улар ўз ўйинимизни кўрсатишга имкон беришмади. Мана шу ёшларнинг ўйинини кўриб шуни айтаманки, ўзбек футболининг келажаги порлоқ. Албатта, натижадан қониқиш ҳосил қилдим. Лекин ўйинимиз кутилган даражада чиқмади. Биринчи лигада ҳам савия ёмон эмас. Айниқса, бизнинг минтақада яхши жамоалар кўп. Масалан, “Истиқлол” ва “Локомотив-БФК” клублари ҳам ёмон таассурот қолдиришмаяпти. Балки “Бунёдкор-2” ёш ўйинчилардан иборат бўлгани учун шогирдларим бир оёқда ютамиз деб ўйлашгандир. Аммо биринчи лигада ҳам осон ўйинларнинг ўзи йўқ.