Англия Премьер-лигасининг 1-туридан ўрин олган “Эвертон” – “Брайтон” учрашуви бошланди. Ярим ҳимоячи Жеймс Милнер илк дақиқаларданоқ майдонга тушди.

BBC хабарига кўра, 38 ёшли Милнер рекорд ўрнатди - у Премьер-лиганинг 23-мавсумида майдонга тушди. Илгари бу рекорд Раян Гиггзга тегишли эди - уэльслик футболчи Премьер-лиганинг 22 мавсумида иштирок этган.

Эслатиб ўтамиз, Жеймс Милнер биринчи марта 2002/2003 йилги мавсумда Премьер-лигада ўйнаган. Англия олий дивизионида Милнер «Лидс», «Ньюкасл», «Астон Вилла», «Манчестер Сити», «Ливерпуль» ва «Брайтон» клубларида ўйнаган.

Бу Милнернинг Премьер-лигадаги 636-учрашуви. Ушбу турнирда энг кўп ўйин ўтказиш бўйича рекордчи Гарет Бэрри (653) ҳисобланади. Милнер мавсум давом этар экан, бу рекордни янгилаши мумкин.