"Манчестер Сити" бош мураббийи Пеп Гвардиола жамоасининг янги мавсумдаги истиқболлари ҳақида ўз фикрлари билан ўртоқлашди.
"Шаҳарликлар" кетма-кет тўрт марта чемпионликни қўлга киритиб, Премьер-лига рекордини ўрнатди. Якшанба куни Гвардиола жамоаси навбатдаги олтин учун курашни сафарда "Челси"га қарши ўйиндан бошлайди.
"Босим бироз пасайди, чунки биз мақсадимизга эришдик [кетма-кет тўрт марта чемпион бўлдик]. Аммо агар биз ўйинда мағлуб бўлсак, хавфсиз бўлиб қоламиз деб ўйлай бошласак, унда яна лигада ғалаба қозона олмаймиз. Агар ишимиз тугади деб ҳисобласак, кучли тўртликка ҳам кира олмаймиз", - дея испаниялик мураббийнинг сўзларини келтиради журналист Саймон Стоун.
