Мадриднинг “Атлетико” клуби ярим ҳимоячиси Конор Галлахер испан тилида мухлисларга мурожаат қилди.

Чоршанба куни "матрасчилар" англияликнинг "Челси"дан трансферини расман эълон қилишди. Шу куни ярим ҳимоячи "Метрополитано"да оммага тақдим этилди. Футболчи томошабинларга испан тилида мурожаат қилди: “Салом, мен испанчани яхши билмайман, лекин жуда хурсандман. Aupa Atleti! - деди Мадриднинг янги футболчиси.

Конор Галлахер "Атлетико Мадрид"га ўтгунга қадар ҳеч қачон Англиядан ташқарида ўйнамаган. 24 ёшли футболчининг трансфер нархи 42 миллион еврога баҳоланмоқда. "Кўклар" тарбияланувчиси Ла Лига клуби билан 2029 йилгача шартнома имзолади.