Мануэль Нойер Германия терма жамоасини тарк этишга қарор қилгани ҳақида гапирди. 38 ёшли дарвозабон аввалроқ терма жамоадаги фаолиятини якунлаш қарорини маълум қилганди.

“Ҳурматли Германия, энди терма жамоадаги фаолиятимни якунлаганимдан кейин Instagram'даги постимдан бироз кўпроқ нарсани ёзмоқчиман.

Мен сизга Германия мен учун нимани англатишини тушунтирмоқчиман. Футбол мен учун нимани англатади?

Чунки, очиғи, бу қарор қийин бўлди. Мен онгим билан юрагим ўртасида аросатда қолдим. Аммо оилам билан гаплашганимдан сўнг, ўзимни керакли вақтда кетаётгандек ҳис қиляпман.

Еврода ғалаба қозониш орқали терма билан хайрлашишни истардим, лекин... 18 ой олдин мен яна футбол ўйнай оламанми, деб ўйлагандим.

Аввалига оёғимни синдирганимда, бу унчалик жиддий иш эмас, деб ўйладим. Вертолёт мени олиб кетади, шифокорлар ўз ишларини қилишади, мен эса майдонга қайтаман.

Аммо мен касалхонага борганимда, бу оддий синиш эмаслиги аниқ бўлди. Футболчи сифатида келажагим шубҳа остида эди.

Мен қўрқиб кетдим. Менимча, ҳамма бундан қўрқиб кетади.

Мен фахрланадиган нарса шундаки, мен ҳеч қачон таслим бўлмаганман.Курашни давом эттирдим. Оилам, дўстларим ва жамоадошларим ёрдамида 2023-йил октябрь ойида, Еврога етти ойдан камроқ вақт қолганида майдонга қайтдим.

Турнир учун жамоага жалб қилинганимда, бу ҳаётимдаги энг муҳим ютуқлардан бири бўлди”, деб ёзади “Бавария” дарвозабони Мануэль Нойер.