БАА бош мураббийи Маҳди Али кеча Дубайда журналистлар билан матбуот анжуманида иштирок этди. Сўнгги ўйинларда ажойиб ўйин кўрсатаётган ярим ҳимоячи Умар Абдулраҳмоннинг келажаги борасида мураббий ўз фикрларини билдириб ўтди.

“Умар энг иқтидорли футболчилардан бири. Бироқ у ўз фаолиятини босқичма-босқич амалга ошириб бориши лозим. Шунчаки Европанинг кучли жамоасига ўтиб, ўйнаб кетиш осон эмас. Бунинг учун у тил билан боғлиқ муаммони ҳал этиши ва янги муҳитга мослашиши лозим. Боиси, Европа ҳаёти бизнинг муҳитдан кескин фарқ қилади. Лекин, шубҳасиз, у ўз фаолиятини кучли жамоада давом эттириши лозим. Шунда у ўсишга эришади", дейди Маҳди.

Мураббий яқин вақт оралиғида Умар бошқа жамоадан расмий таклиф олишига умид қилишини айтиб ўтди.

“Ҳозирча унинг жамоаси “Ал-Айн” Умар Европа жамоаларидан ҳеч қандай расмий таклиф олмаганини таъкидламоқда. У Лондонда бўлиб ўтган Олимпия ўйинларида ўзини кўрсата олди ва Европада ўйнаб кетиш учун унда маҳорат етарли”, дейди Али.