Анвар эл-Гази "Майнц"дан олинадиган пулларини Ғазо болаларига хайрия қилади.

2023-йил 7-октабрда Фаластин-Исроил можароси авж олганидан кейин Анвар ижтимоий тармоқларда шундай ёзган эди: “Бу можаро ёки уруш эмас. Бу геноцид ва оммавий қирғин ва биз буни жонли кўриб турибмиз”. У хабарни Фаластиннинг озод этилиши ҳақидаги шиор билан якунлади, бироқ кейин постни ўчириб ташлади. "Майнц" футболчини машғулотлар ва ўйинлардан четлатди.

Ўтган йилнинг ноябрь ойида немис клуби нидерландиялик ярим ҳимоячи билан шартномани бекор қилганди. Футболчи "Майнц" меҳнат судига бориб, вазиятни ўз томонига ҳал қилди. Жамоа футболчига 1,7 миллион евро тўлашга мажбур бўлди.

"Бугун "Майнц"дан катта миқдорда пул олганимдан сўнг, шуни айтмоқчиманки, суд жараёнимнинг асоси пул эмас эди.

Бироз вақт ажратиб, иккита нарса учун "Майнц"га раҳмат айтмоқчиман.

Биринчидан, катта молиявий компенсация учун, шундан 500 минг евро Ғазодаги болалар учун лойиҳаларни молиялаштиришга йўналтирилади", – деди футболчи.