Суперлигада 17-тур ўйинлари давом эттирилди. "Локомотив" жамоаси бу тур ўз майдонида "Қизилқум"ни қабул қилди ва 4:2 ҳисобида ғалаба қозонди. Беллашувдан сўнг жамоа бош мураббийи Александр Крестинин матбуот анжуманида иштирок этди.
Осон бўлмаган ўйин эди бу. Рақиб жуда тартибли ҳаракат қилади. Кўп гол киритмаганига яраша, кам ўтказиб юборади. Яхши тайёргарлик кўрган эдик. Айтганимдек, йигитларда потенциал катта. Ўйлаганимизнинг барчаси амалга ошди. Локомотив ишқибозларини ғалаба билан табриклайман.
"Локомотив" 20 дақиқада 4 та голни қандай киритди?
Албатта, биз учрашувга тайёргарлик кўрдик. Рақибнинг ўйинини ҳам ўрганган эдик. Тўғри ўйнадик. Олдинги чизиқда жамоавий ҳаракат қилдик. Бугун режаларимизнинг барчасини омадли ижро этдик. Йигитлар яхши тайёргарлик кўришган эди. Руҳан, бизга катта ишонч беради.
Дарвозабон Суҳроб Султоновнинг алмашгани ўтказиб юборган голлари билан боғлиқми?
Бизда бир эмас, 5 та ўзгариш бўлди бу баҳсда. Ўтган беллашувдаги хулосаларимиздан келиб чиқиб шу ишга қўл урдик. У машғулотларда яхши ишламоқда. Бугунги ўйинга бизнинг танловимиз шундай бўлди холос.
"Локомотив"га ўтган беллашувларда нима етишмаган эди? Бугунги ўйин фонида жавоб берсангиз?!
Албатта, ўйин динамикаси эди муамо. Тактик ёки жисмоний тайёргарлик борасида ҳеч қандай муаммо йўқ эди. Бугун жанг қилишди ва керакли даражада майдон бўйлаб ҳаракат қилишди. Тўпсиз ва тўп билан яхши ўйнадик. Аввалги қарама-қаршиликларда буни амалга ошира олмаган эдик.
Лазиз Мирзаевнинг бугунги ҳаракатлари ҳақида фикрингиз қандай?
Биз омма олдида футболчиларга баҳо бермаймиз. Жамоа ҳақида фикр билдиришимиз мумкин. Жамоа бугун иккита гол ўтказиб юборганига қарамай, яхши ўйин кўрсатди. Барчасини кўриб, таҳлил қиламиз. Умуман олганда, осон бўлмаган рақибга қарши яхши ўйин кўрсатди.
Жамоа уй учрашувларини нейтрал майдонда ўтказаётганингиз қай даражада таъсир қилмоқда?
Уй стадион албатта, ёқимли. Билмадим, бу бизга ёрдам бера олаяпти ёки йўқ деб айта олмайман. Биз, бундай бўлишини аввалдан билар эдик ва бунга тайёргарлик кўрганмиз. Бу саволга эътибор қаратмаймиз.
Икки ҳафталик танаффусда жамоани тонусда ушлаб туришда муаммо бўлмайдими?
Биз инсон организмидаги ўзгаришларни биламиз. Икки ҳафта давомида керакли ишларни амалга оширамиз. Бундан аввалроқ, 3 ҳафталик пауза ҳам бўлган эди. Бу нормал вазият.
ФИФА кунида Ўзбекистон Қирғиз Республикаси билан расмий ўйинда иштирок этади. Тахминингиз борми?
Биз мураббийлар тахмин қилмаймиз, аммо жуда яхши ўйин бўлишини айта оламан. Бу аниқ. Қирғизистонга ҳурмат сақлаган холда айтишим мумкин, Ўзбекистон бу баҳсда фаворит. Рейтинг ҳаммасини кўрсатиб турибди. Қирғизистоннинг ўйинини синчиклаб кузатаман ва мухлислик қиламан. Бу мамлакат менга жуда кўп нарса берган.
