Футзал бўйича вилоят ёшлар (U-19) терма жамоалари иштирокидаги Ўзбекистон Биринчилиги баҳслари якунига етди.

19-23 апрель кунлари Тошкентдаги «Ўзбекистон» спорт мажмуасида футзал бўйича вилоят ёшлар (U-19) терма жамоалари иштирокида Ўзбекистон Биринчилиги баҳслари бўлиб ўтди. Ушбу мусобақа футзал бўйича Ўзбекистон ёшлар (U-19) терма жамоасини шакллантириш, шунингдек, футзалдаги иқтидорли ёш ўйинчиларни саралаб олиш мақсадида ташкил этилди.

23 апрель куни бўлиб ўтган финал учрашувида Тошкент вилояти терма жамоаси Тошкент шаҳри жамоасига қарши майдонга чиқди. Қизиқарли курашларга бой бўлган ўйин Тошкент вилояти терма жамоасининг 3:1 ҳисобидаги ғалабаси билан якунига етди.

3-ўрин учун ўйинда Жиззах олимпия захиралари коллежи жамоаси Самарқанд вилояти терма жамоасини 4:3 ҳисобида мағлубиятга учратди.

Барча ўйинлар якунига кўра, Тошкент вилояти терма жамоаси аъзоси Дониёр Исмоилов мусобақанинг энг яхши тўпурари деб топилди. Ёш ўйинчи Биринчилик баҳслари давомида рақиблари дарвозасига жами 15та гол уришга муваффақ бўлди.