Суперлигада 17-тур баҳслари давом эттирилди. "Навбаҳор" жамоаси бу тур сафарда "Сурхон" билан куч синашди ва Сияваш Ҳақназарийнинг ягона голи эвазига ғалабага эришди. Беллашувдан сўнг жамоа бош мураббийи Сергей Лушчан матбуот анжуманида иштирок этди.
Ўйин ва натижадан кўнглим тўлди. Менинг бошқарувимда жамоа илк бор дарвозасидан гол олиб чиқмади ва биринчи бўлиб гол киритди.
Умид қиламизки, бу ғалаба "Пахтакор" билан ўйин олдидан руҳий далда бўлади?!
Албатта, ҳозир айнан биз ишлаётган иккинчи аспект руҳий холат билан боғлиқ. Футболчиларимизнинг ўйин даражаси рақибларникидан баланд, бироқ гол киритишга келганда оқсаяпмиз. Нега эканлигини билмайман. Ваҳоланки, машғулотларда мўжиза кўрсатиб ташлаяпмиз. Йигитлар биринчи даврада керагидан ортиқ ўйинда очко йўқотгани учун чўчиб қолган. Чемпионлик мақсади қўйилган жамоага ташаббусга эга бўлган холда 7 та дуранг ўйнаши салбий таъсир қилган. Мана шундай оғир учрашувлардан сўнг барчада руҳий ҳолат яхшиланиб, ўз кучига ишонч пайдо бўлишни бошлайди. Ярим финалдаги ғалаба ўзимизни янада яхшироқ ҳис қилиш имконини беради.
Бугун рақибни яхши ўрганганингиз ҳақида айтингиз. Абдусаломовни зич зонада қолдириш ҳам режада бормиди?
Такрорлайман, биз жуда кичик деталларгача ўргандик. Бир ҳафта давомида айнан шу учрашув учун тайёргарлик кўрдик. Яхши жамоа шаклланган "Сурхон"да. Биз устунликни топширган ҳолда, иккинчи рақамда ўйнадик. Менимча, натижа адолатли бўлди. Якунда, ҳисобни катталаштиришимиз ҳам мумкин эди. Рақибдан 100 фоизлик имконият бўлганини эслай олмайман. Йигитлар бугун мудофаада ишончли ўйин кўрсатди.
