"Манчестер Юнайтед" ярим ҳимоячиси Жейдон Санчо бошқа жамоага ўтишга яқин турибди. Бу ҳақда инсайдер Девид Орнштейн Х ижтимоий тармоғида хабар берди.
Инсайдер хабарига кўра, "қизил иблислар" ёзги трансфер ойнаси ёпилгунга қадар "Ювентус" ва "Челси" билан футболчини ижарага бериш ёки сотиш борасида музокаралар олиб боришмоқда. "Челси"га ўтиш бошқа ўйинчи билан алмашишни ўз ичига олиши мумкин. Рахим Стерлинг энг эҳтимолий алмашув варианти ҳисобланади, лекин бу битимни амалга ошириш бир қатор шартларни келишиб олишни талаб қилади.
Эслатиб ўтамиз, Жейдон Санчо 24 август куни бўлиб ўтган Англия Премьер-лигасининг 2-туридан ўрин олган "Брайтон" билан ўйин учун қайдномага киритилмаган эди. Аввалроқ у "Фулхэм" билан 1-тур ўйинини ҳам ўтказиб юборган (1:0). "Манчестер Юнайтед" бош мураббийи Эрик тен Хаг, Санчонинг йўқлиги сабабини соғлиғи билан боғлиқ муаммолар ва таркибдаги ўрин учун юқори рақобат билан изоҳлади.
