"Manchester Yunayted" yarim himoyachisi Jeydon Sancho boshqa jamoaga o‘tishga yaqin turibdi. Bu haqda insayder Devid Ornshteyn X ijtimoiy tarmog‘ida xabar berdi.
Insayder xabariga ko‘ra, "qizil iblislar" yozgi transfer oynasi yopilgunga qadar "Yuventus" va "Chelsi" bilan futbolchini ijaraga berish yoki sotish borasida muzokaralar olib borishmoqda. "Chelsi"ga o‘tish boshqa o‘yinchi bilan almashishni o‘z ichiga olishi mumkin. Raxim Sterling eng ehtimoliy almashuv varianti hisoblanadi, lekin bu bitimni amalga oshirish bir qator shartlarni kelishib olishni talab qiladi.
Eslatib o‘tamiz, Jeydon Sancho 24 avgust kuni bo‘lib o‘tgan Angliya Premyer-ligasining 2-turidan o‘rin olgan "Brayton" bilan o‘yin uchun qaydnomaga kiritilmagan edi. Avvalroq u "Fulxem" bilan 1-tur o‘yinini ham o‘tkazib yuborgan (1:0). "Manchester Yunayted" bosh murabbiyi Erik ten Xag, Sanchoning yo‘qligi sababini sog‘lig‘i bilan bog‘liq muammolar va tarkibdagi o‘rin uchun yuqori raqobat bilan izohladi.
