Хабар берганимиздек, Ўзбекистон спорт делегацияси “Париж-2024” XVII ёзги Паралимпия ўйинларида иштирок этиш учун Франция пойтахтига етиб келди. Шу муносабат билан делегация раҳбарияти пара спортчиларимиз яшаётган Паралимпия шаҳарчасига ташриф буюриб, у ерда яратилган шароитлар билан танишди.
Дастлаб, Ўзбекистон Миллий паралимпия қўмитаси раиси – Осиё Паралимпия қўмитаси вице-президенти Мухторхон Тошхўжаев ва Спорт вазири ўринбосари Мурод Исмоилов бошчилигидаги масъуллар иштирокида шаҳарчадаги Ўзбекистон делегациясининг тезкор штабида йиғилиш ўтказилди. Унда ҳар бир мутахассисга ўзига юклатилган вазифаларни юқори даражада бажариш, юртимиз пара атлетлари учун барча шароитларни яратиб бериш борасида тегишли кўрсатмалар берилди. Сўнгра, бўлажак ўйинлар олдидан дуога қўл очиб, матонатли пара спортчиларимизга омад ва муваффақиятлар тилади.
Шундан сўнг мутасаддилар делегациямиз учун ажратилган хоналар, тиббиёт бўлими ва спортчиларнинг овқатланишлари учун яратиб берилган шароитларни кўздан кечирди.
