Маълумки, эртага Ўзбекистон Кубоги ярим финал доирасида “Андижон” жамоаси “Бобур арена”да “Сурхон”ни қабул қилади. Ҳозирда барча эътибор бўлажак ўйинга қаратилган. Жамоа аъзолари ҳам бутун эътиборини ярим финал учрашувига қаратишган.

Олдин хабар бериб ўтилганидек, бир қатор ўйинчилар жароҳатидан фориғ бўлиб яна асосий гуруҳ машғулотларига қўшилдилар. Айни пайтдаги футболчилар ҳолати ва жароҳатидан фориғ бўлганлар ҳақида клуб бош шифокори Саломхон Қосимов “Андижон” матбуот хизматига қуйидагича маълумот берди.

“Жамоамиз ҳимоячиси Ислом Маматказин “Бунёдкор” билан ўйинда чап оёғ тўпиғидан жароҳат олганди. Режа асосида даволаниш ва тикланиш муолажалари олиб борилди. Ҳозирги кунда машғулотларда тўлиқ куч билан иштирок этмоқда. Жамоамизнинг яна бир асосий ҳимоячиларидан, ўнг қанот футболчиси Абдулвоҳид Ғуломов машғулотлар жараёнида ўнг оёғидан жароҳат олганди. У билан ҳам даволаниш ҳамда тикланиш муолажалари олиб борилди ва эндиликда тўлиқ соғайиб асосий машғулотларда иштирок этяпти. Чап қанот легионер ҳимоячимиз Любиша Пецел эса “Бунёдкор”га қарши баҳсда бел умуртқалари десторцияси билан безовта қила бошлади. Даволаниш муолажалари тўлиқ олиб борилди ва ҳозирги кунда асосий машғулотларда қатнашяпти.

Хабарингиз бор, дарвозабонимиз Игорь Литовка ҳам “Бунёдкор” билан учрашувда ўнг елкасидан жароҳатланганди. Текширувлар натижасида қарийб уч ҳафталик даволаниш режаси ишлаб чиқилди. Ҳозирги кунда индивидуал машғулотларга киришган. Худо хоҳласа, “Локомотив” билан бўладиган уй ўйинимизга тайёр бўлади. Қолган ўйинчиларимиз соғ-саломат ва барчаси эртанги учрашувга тайёр”, - дейди клуб бош шифокори.