"Насаф" футбол клубида жорий йилдан фаолият олиб бораётган таниқли шифокор Рустам ака Меҳмоновдан кейинги пайтларда ҳароҳат олиб, майдонга тушмаётган ўйинчиларнинг ҳозирги ҳолати тўғрисида мухлислар учун маълумот беришини сўраб, мурожаат қилдик.

— Рустам ака, кейинги пайтларда "Насаф"нинг бир қанча ўйинчилари жароҳати туфайли ўйинларда иштирок этишмаяпти, шу ўйинчилар тўғрисида жамоа мухлислари учун сиздан маълумот олмоқчи эдик.
— Ўзларингизга маълум, Фарғонада бўлиб ўтган "Нефтчи"-"Насаф" учрашувида жамоанинг кейинги пайтларда мухлислар назаридан тушмаётган Алишер Юсупов тиззасидан жароҳат олди. Биз Алишерни махсус медицина аппаратлари ёрдамида тўлиқ кўрикдан ўтказдик, Худога шукур жароҳати жиддий бўлиб чиқмади. Ҳозир у тикланиш жараёнини ўтказмоқда, икки ҳафтадан сўнг майдонга қайтаришни мўлжаллаб турибмиз.

— Кенжа Тўраевнинг ҳозирги аҳволи қандай?
— Кенжа Москвада жарроҳлик амалиётини ўтказганини биласизлар, жарроҳлик амалиёти муваффақиятли ўтди. У ҳозирги пайтда ўз уйида. Афсуски, медицина талаби бўйича уни майдонга қайтишига тахминан олти ой керак бўлади, ҳозир у юра бошлади, аста-секин вақт ўтиши билан енгил чопиш машқларини бошлайди.

— Жаҳонгир Жиямуродов ҳақида ҳам айтиб ўтсангиз.
— Жаҳонгир ҳам ҳозир тикланиш жараёнини ўтказяпти, яқинда якка ҳолда машқларни бошлайди. Шунингдек, у яқинда базамизга келади, аммо уни ҳам майдонга тушишига яна вақт керак бўлади. Насиб бўлса, иккинчи давра ўрталарига келиб ўйнашга тайёр бўлади.

— Бошқа ўйинчиларда жароҳат йўқми?
— Бошқа ўйинчиларимизнинг ҳаммаси соғ-саломат, улар 28 апрель куни Қаршида бўладиган "Шўртан"га қарши Кубок ўйинига ҳозирги пайтда қизғин тайёргарлик кўришаяпти.

— Рустам ака, маълумотлар учун сизга катта раҳмат, ниятимиз  ўйинчиларимиз шундай жароҳатлардан йироқ бўлишсин.