"Ал-Аҳли" ҳужумчиси Айван Тоуни Саудия клуби билан тузилган шартномага кўра ҳафтасига деярли 600 минг евро олади, деб хабар беради инсайдер Фабрицио Романо.
Манбага кўра, ҳужумчининг белгиланган маоши 475 минг еврони ташкил қилади ва бонусларни ҳисобга олсак, Тоуни 593 минг евро олиши мумкин. Эслатиб ўтамиз, "Ал-Аҳли" 31 август куни 28 ёшли Айваннинг трансферини эълон қилганди. Футболчи 2028 йилнинг ёзига қадар шартнома имзолади.
Тоуни 2020 йил сентябрь ойидан бери "Брентфорд"да ўйнаб келаётганди. Ўтган мавсумда у барча мусобақаларда 17та ўйинда қатнашиб, тўртта гол ва иккита голли узатмага муаллифлик қилган. Умуман олганда, ҳужумчи майдонда 1449 дақиқа ўтказди. Transfermarkt порталида берилган маълумотларга кўра, футболчининг бозор қиймати 50 миллион еврони ташкил қилади.
