"Манчестер Юнайтед" вингери Антони миш-мишларга қарамай, бошқа жамоага ўтишни режалаштирмаяпти.

Бразилиялик ўзини Англияда кўрсата олмаяпти ва кўпинча танқид ҳамда масхара қурбонига айланмоқда. Яқинда пайдо бўлган маълумотларга кўра, 24 ёшли футболчининг фаолиятини қайта бошлаш имкониятини Жозе Моуриньо бошчилигидаги Туркиянинг "Фенербахче" клуби тақдим этиши мумкин, аммо Антонининг ўзи бу вариантга қизиқмаган кўринади. The United Stand хабарига кўра, келишув футболчининг "қизил иблислар"ни тарк этишни истамагани учун амалга ошмайди - у бу мавсумда ўзини кўрсатишга умид қилмоқда.

Янги мавсумда Антони Эрик тен Хаг жамоаси учун фақат битта ўйинда қатнашди. Нидерландиялик мураббий "Брайтон" билан ўйиннинг сўнгги дақиқаларида бразилиялик футболчига имконият берди.