"Реал Мадрид" вингери Винисиус Жуниорнинг баёноти кутилганидек Испанияда акс-садо берди. Мадрид мэри Хосе Луис Мартинес-Алмейда бразилиялик футболчи ўз хатосини тан олишини ва кечирим сўрашини истайди.
"Биз ҳаммамиз жамиятда ирқчилик борлигини ва уни йўқ қилиш учун кўп ҳаракат қилишимиз кераклигини биламиз. Лекин биз ирқчи жамиятмиз дейиш, хусусан, Испания ва Мадридга нисбатан чуқур адолатсизлик бўлади. Бундан ташқари, ирқчиликни сабаб қилиб 2030 йилги Жаҳон чемпионатига таҳдид солиш.
Мен Винисиусдан буни тузатишини сўрайман, у кечирим сўраши керак. Ирқчи эпизод содир бўлганда, биз ҳаммамиз унинг тарафида бўламиз, лекин биз ирқчимиз десангиз, ҳаммамиз унинг тарафида эмасмиз. Чунки бу ҳақиқат эмас. Агар сиз хато қилсангиз, уни тузатишингиз керак. У ажойиб футболчи бўлгани учун у хато қилолмайди дегани эмас ва у бу сафар ҳам шундай қилди.
Испания жамиятининг аксарияти ирқчиликка қарши курашда Винисиус томонида, лекин у деярли барча испан жамиятини ва айниқса Мадрид жамиятини ирқчи деб атаса, биз унинг тарафида бўла олмаймиз. Мен буни қабул қила олмайман. Шуни таъкидлаш керакки, бразилиялик дунёдаги энг очиқ, меҳмондўст ва ранг-баранг шаҳарлардан бирида яшайди. Мадридга хос бир жиҳат бўлса, бу ерда ким қаердан келганига қарамайди.
Винисиуснинг муайян қайғули эпизодларни бошдан кечириши унга деярли бутун испан жамиятини ирқчи деб аташ ва ЖЧ-2030 бу ерда ўтказилмаслиги керак, дейиш ҳуқуқини бермайди", - деди Алмейда Marca билан суҳбатда.
