ЎФА техник директори Ги Киала бошчилигида Про лицензияси учун ўқув курслари центябр ойида старт олди. Унда жами 21 нафар мутахассис таҳсил олаётган бўлиб, шуларнинг тўрт нафари хорижлик ҳисобланади: Мирко Еличич (Австралия), Боян Миладинович (Сербия), Жасвиндер Синҳ (Сингапур), Меҳдий Маҳдавикия (Эрон).
Ўқув курси умумий 8 та модулдан иборат бўлиб, у 2025 йилнинг декабрь ойида якунига етади. Бельгиялик Ги Киала Про лицензияси учун ўқиш ниятида бўлган талабгорларни саралаб олиш тизимини янгилади. Шунингдек, Лига билан келишув асосида якуний битирув имтиҳони ҳамда умумий баҳолаш тизимини қатъийлаштирди. Эндиликда Про лицензияси учун таҳсил олаётган мутахассислардан барча модуллар ҳамда имтиҳонларга жиддий ёндошув талаб этилади. Хорижлик мутахассис назорати остида ташкил этилаётган курсни якунлаш ва тегишли дипломга эга чиқиш осон бўлмайди. Мазкур талаб аввалроқ ЎФА президенти томонидан техник директор олдига вазифа сифатида белгилаб берилганди.
Шунингдек, 21 нафар мутахассиснинг Европада тажриба алмашиши учун имконият яратилади. Хусусан, модуллар орасидан Бельгия сафари ҳам ўрин олган бўлиб, унинг давомида 21 нафар мутахассис Бельгия футболи тизими, мураббийлик малакасини ўрганиш ҳамда бошқа зарурий ахборот алмашиш имкониятига эга бўлади.
Аввалроқ Лига Про лицензиясига эга мутахассислар рўйхатини тақдим этганди. 14 ойдан сўнг улар сафига бугунги рўйхатдан қайси мутахассислар қўшилиши маълум бўлади.
