"Реал"нинг собиқ футболчиси Серхио Рамос Лука Модрични туғилган куни билан табриклади.

9 сентябрь куни “Лос-Бланкос” ва Хорватия терма жамоаси ярим ҳимоячиси ўзининг 39 ёшини нишонлади. Бир кун олдин футболчи Миллатлар лигаси доирасида Польшага қарши ўйинда (1:0) жарима зарбасидан гол уриб, терма жамоасига ғалаба келтирди. Бу учрашув Модричнинг "шашкачилар" таркибидаги 180-ўйини бўлди.

“Лукита, табриклайман, ака. 39 йиллик сеҳр ва яна кўп нарса олдинда... Шунингдек, терма жамоангиздаги 180-учрашувингиз билан табриклайман. Сиз ҳар доим менинг жамоамдасиз, мен сизни яхши кўраман”, - деди Серхио Рамос ижтимоий тармоқларда Лукага.

Эътиборлиси, Рамос Испания терма жамоаси сафида 180 та ўйин ўтказган.