Президент Шавкат Мирзиёев 13 сентябрь куни Кўксарой қароргоҳида Париждаги Паралимпия ўйинларида иштирок этган спортчилар, уларнинг ота-оналари ва мураббийлари билан учрашув ўтказди. Унда сўзга чиққан Асила Мирзаёрова ўз мақсадлар ҳақида гапирди.

“Токио Олимпиадасида кумуш медални қўлга киритганимда Ўзбекистон байроғи пастда турган эди. Ўшанда ўзимга ваъда бергандим, бундан кейин ҳеч қачон ватаним байроғи пастда турмайди деб. Яратилган имкониятлар сабаб икки карра Жаҳон чемпиони бўлиб, ўзимга берган ваъдамнинг устидан чиқиб Олимпиадада ҳам олтин медални қўлга киритдим. Мусобақа куни менда катта масъулият бор эди. Диёра Келдиёровадек олтин медални қўлга киритсам, бошқа жамоадошларим ҳам илҳомланиб медалларни қўлга киритишига ишонгандим. Францияда сал кам 30 йиллик рекордни янгилаб, мусобақада Ўзбекистон учун биринчи олтин медални олиб келганимдан жуда ҳам хурсандман. Мен ҳозирданоқ ўзимга катта мақсадларни қўйдим. 2028 йилда Лос-Анжелесда бўлиб ўтадиган Паралимпия ўйинларида ўзим қўйган рекордни янгилаб, икки карра Паралимпия чемпиони бўлишга ваъда бераман”, деди Паралимпия чемпиони Асила.

Маълумот учун, Асила Мирзаёрова Т11 классида узунликка сакраш баҳсида иштирок этиб 5,24 метр натижа билан Паралимпия ўйинлари рекордини ўрнатди ва олтин медални қўлга киритди.

Аввалроқ Қашқадарё ҳокими Асила Мирзаёровага Қарши шаҳридаги кўп қаватли хонадонлардан 2 хонали уй совға қилингани хабар берилганди.

Бундан ташқари, президент қарорига биноан спортчига 200 минг АҚШ доллари миқдоридаги пул мукофоти, Tahoe русумли автомобиль ва Тошкент шаҳридан коттеж совға қилинди.